edat s 1 Kantidat di tempu di eksistensia di hende, bestia o kos. E señora ei tin 99 aña di edat. Den sierto ref di koral tin spòns di mas di 2.000 aña di edat. Ora koba saka opheto i wesu di hende òf bestia fo’i bou di tera, arkeólogo i antropólogo tin método sientífiko pa fiha nan edat. 2 Kada periodo di bida humano. E shon di setenta aña ei ta gusta bisti paña ku no ta pas pa su edat. Kada edat tin su enkanto. 3 Kada un di e periodonan grandi di tempu den kua tradishonalmente ta dividí historia. Nos a bishitá un eksposishon di pintura di Edat Medio. | di edat Periodo di bida riba sesenta aña. Mi amiga tin 65 aña, ya e ta un señora di edat. | Edat Antiguo Periodo históriko promé ku Edat Medio, for di aparishon di e promé eskritura te fin di Imperio Romano na 476 di Era Komun. | Edat di BrònsSegundo periodo di Edat di Metal, promé ku Edat di Heru i despues di Edat di Koper, karakterisá pa uso di bròns den fabrikashon di arma i hèrmènt. | Edat di Heru Terser periodo di Edat di Metal, despues di Edat di Bròns, karakterisá pa uso di heru den fabrikashon di arma i hèrmènt. | Edat di Koper Promé periodo di Edat di Metal, promé ku Edat di Bròns, karakterisá pa uso di koper den fabrikashon di arma i hèrmènt. | Edat di Metal Periodo prehistóriko despues di Edat di Pieda, durante kua a kuminsá usa metal. | Edat di Oro Periodo di mayor splendor i di bonansa na e paisnan europeo, spesialmente pa loke ta arte, e.o. literatura, pintura i eskultura. Siglo XVI i XVII ta e Edat di Oro di literatura spañó. Siglo XVII ta e Edat di Oro hulandes, un periodo floresiente i di bonansa riba tereno di komèrsio, poder i desaroyo di siensia i arte. | Edat di Pieda Periodo prehistóriko promé ku a kuminsá usa metal. | Edat Kontemporanio Periodo históriko despues di Edat Medio, m.o.m. for di final di siglo XVIII te awe. | Edat Medio Periodo históriko promé ku Edat Modèrno i despues di Edat Antiguo, m.o.m. e temporada for di siglo V te prinsipio di siglo XV. | edat mental Grado di desaroyo intelektual di un persona. E tin diestres aña, pero su edat mental ta di un mucha di kuater aña. | Edat Moderno Periodo históriko promé ku Edat Kontemporanio i despues di Edat Medio, m.o.m. for di final i siglo XV te prinsipio di siglo XIX. | kuarto edat Ansianidat di bida for di ochenta aña. | mayor di edat Bisá di persona ku a alkansá e edat ku lei di su pais ta fiha ku e por ehersé tur derecho sivil i ku e ta responsabel pa su aktonan. | mayoria di edat Periodo di bida for di 18 òf 21 aña, dependiente di e pais kaminda u.h. ta biba, edat fihá pa lei pa e hende ei por ehersé tur su derechonan sivil. | menor di edat Bisá di persona ku no alkansá e edat ku lei ta fiha pa konsider’é responsabel pa su aktonan. E hóben ei ta menor di edat, p’esei ta tur su dos mayornan a firma pa e bai hunga béisbòl profeshonal na Merka. | minoria di edat Periodo di bida for di nasementu te na e edat ku lei di un pais ta konsiderá u.h. responsabel pa su aktonan. | segundo edat Periodo di bida for di kuarenta aña. | terser edat Periodo di bida di un persona ku ta kuminsá banda di sesentisinku aña.
Èzè s (ant) ‹var› Zè 1 Figura metafísiko ku, segun un kreensia bieu, por a sagudí kita kueru fo’i su kurpa i bira invisibel. Na Punda tabata yam’é Èzè, na kunuku Zè. Ta simbolis’é komo un para grandi, pretu, ku ta buska prinsipalmente yu chikí resien nasí, pa chupa nan sanger ku un pipa largu, invisibel. P’esei nuebe dia largu despues di nasementu, hòmber armá ku chikoti tabata bin tene warda ‘wak Zè’, anto riba e último dia ku Èzè ta bin purba su suèltu, nan ta purba kaba kuné. Dramatisashon di e figura Èzè komo protagonista tabata un kustumber na Bok’i Samí, tambe na otro parti di Kòrsou, kada lugá ku un interpretashon un poko distinto di e kreensia popular. Tabata spanta mucha ku e figura ‘Èzè’ òf ‘Zè’.