Trahamentu di un dikshonario asina ta trabou di tim. E tim ta konsistí aktualmente di shete redaktor. A parti lèternan di álfabèt entre redaktornan pa nan splika entradanan di nan lèter. A kuminsá definí i/o deskribí entrada i a usa komo archivo palabranan di Sidney Joubert su dikshonario. Tambe e forma di e dikshonario tabata bai desaroyando na kaminda.
Redaktornan ta splika i/òf definí e entradanan. Den reunionnan semanal di e Tim di Redaktor ta inventarisá i analisá e problemanan ku tabata presentá na kaminda. A kompilá i strukturá e solushonnan den un Instrukshon Redakshonal (IR), un manual di regla ku, segun ta traha, a adaptá i amplia, a base di eksperensia, investigashon i deliberashon lingwístiko, na diferente okashon. Esaki tin komo apèndeks e.o. un lista di variante di kua un kantidat ta e únikonan ku tin preferensia, un kantidat di variante ku tin promé i di dos preferensia, i tambe un lista di palabra fiá di orígen hulandes, ingles i spañó, ku lo paresé den DSP. Tambe e IR tin komo apèndeks algun regla di uniformidat di redakshon.
Banda di definishon i/òf splikashon di entrada, ta duna informashon tokante kategoria gramatikal di e palabra; ta duna e palabra un label kaminda ta nesesario, p.e. si e palabra ta antikuá (ant), vulgar (vulg), informal (inf), òf ta konsider’é ainda un palabra strañero ingles (ing), spañó (spa), hulandes (hul) òf di otro lenga.
Sistema di kontròl
Redaktornan di DSP ta traha segun un sistema di kontròl interno na diferente nivel: e Redaktor so, Redaktor ku kontròl segun nesesidat di un Kolega Fiho, kontròl di Grupo di Revishon, di Grupo Lingwístiko, di Reunion Plenario i di Redakshon Final. Despues di kada kontròl e entrada ta pasa pa un siguiente nivel. Kaminda tin duda o no por yega na akuerdo ta manda e asuntu Reunion Plenario pa deliberashon i desishon. Ta despues di tur e proseso di kontròl akí ta manda e trabou pa Redakshon Final pa Eithel Martis i Chila Bolivar hasi un último revishon.
Kantidat di palabra
Segun ta traha, mas palabra ta bini aserka. Den leksikografia ta papia di entrada. A kuminsá ku algu ménos ku 17.000 entrada. Na esakinan a añadí entrada di otro fuente, ku no ta dikshonario di Sidney Joubert, manera dikshonario di Van Putte, di obra di outornan ku a skibi na papiamentu, di korant i otro fuente skibí i di fuentenan oral. Di e manera akí redaktornan a agregá te ainda algu mas di 4.000 entrada. Aktualmente tin kasi 21.000 entrada den DSP.
Programa di kòmpiuter
A base di nos manera di traha a diseñá un programa di kòmpiuter na midí pa hinka i prosesá e entradanan.