N,n

nabegá v 1 v tr/intr Originalmente, avansá òf biaha, via laman, di un lugá pa otro den un boto òf barku. Despues tambe, avansá òf biaha na laira den un avion òf nave espasial. E piskadó a nabegá su boto te den laman ganchu na Nórkan, kaminda sa tin piská kòrá i dradu. E barku ta nabegá sinku mia for di kosta di Puerto Rico. El a invitá nos pa nabegá den su yate pa nos bishitá Galápagos. E kuater astronoutanan merikano ta nabegá den espasio den direkshon di luna. 2 v tr/intr Stür un boto òf barku. E stürman akí ta nabegá barku di mas di 100.000 tòn. Un èkskapitan di tènker ta siña studiantenan nabegá na skol nóutiko. 3v intr Traha komo nabegante òf tin otro funshon na bordo di un barku. Ántes tabatin muchu mas hende hòmber ku tabata nabegá for di ora nan ta hóben te dia nan baha ku penshun. 4 v intr Uza kontròl remoto pa (keda) kambia kanal di televishon. Si mayornan di e mucha di ocho aña deskuidá, e ta nabegá oranan largu i mira tur tipo di programa di televishon. ‹sin› zèp 5 v intr Move di un website di internet pa otro pa buska informashon. Na grandi mi tanta a kuminsá nabegá riba internèt pa buska informashon riba tur sorto di tereno. Bo ta subi e portal menshoná i ei bo ta nabegá buska bo informashon. ‹sin› sùrf || Esp navegar Port navegar Fr naviguer Eng sail; navigate; surf Ned varen; varen, navigeren; zappen, surfen