rabu s 1 Órgano eksterior na e parti final di kolumna vertebral di kurpa di algun animal. Rabu di kabai, rabu di kachó, rabu di para, rabu di pushi, rabu di piská, rabu di bakiou, rabu di skarpion. 2 (fig) Órgano seksual di hende hòmber. ‹sin› bastòn, basora, bayòs, bòzòzò, dòlò, gurdein, houru, palu, patin, shòròmbu, zozo, zuans 3 Kompaño no apresiá òf indeseá (di yu, kasá, amigu òf otro hende). Mario, no bini mi fiesta ku rabu; bini bo so. Mi no tin kaminda di laga mi sinku yunan, p’esei unda ku mi bai, mi ta ku rabu mi tras. 4 Bisá di tur loke ta kologá manera rabu di animal. Rabu di e fli ta muchu kòrtiku. 5 Parti di algun animal ku ta uza komo ingrediente pa prepará sierto plato krioyo. E biaha akí mi no a tira rabu di porko den e bonchi kòrá. Ayera mi a traha un bon sòpi di rabu di baka pa mi famia. | baka brabu rabu largu Esaki ta un trabalenga o sea un kombinashon di palabra paresido ku ta difísil pa pronunsiá diferente bia rápidamente tras di otro. | barí di rabu Resipiente rondó, di palu den kua tabata warda rabu salgá den tienda òf toko. | dobla rabu bai Kita bai ku bèrgwensa for di un lugá. Hala kita. | Kabai rabu stòmpi no tin bos. Esun ku ta pober tin di baha kabes pa esun ku ta riku. | kana ku rabu 1 Kana ku kasá, yu, amigu òf otro hende bo tras. 2 Sali ku mucha òf yu chikitu. | laga frena bai, kohe rabu. Ta mihó entregá algu awor ku pèrdè mas despues. | lanta rabu Saka bientu. | maishi di rabu (Sorghum vulgare) Sorto di maishi ku ta hecha tempran. Tambe: (Ar) maishi di shete siman. | Nesesidat ta rabu di pekadó. Falta di plaka por pone hende hasi malu. | pone rabu pa u.h.Tene relashon seksual ku u.h. | rabu di avion Parti patras di un avion. | rabu di bakiou Bachi pretu dèftu di hende hòmber ku ta kaba ku dos punta largu parti patras. E brùidehòm tabatin un rabu di bakiou masha elegante bistí. | rabu di gai 1 Spada kurvá, korkobá. 2 (Tournefortia volubilis) Yerba ku ta krese haltu i na bòshi den otro mata. E tin un flor chikitu blanku, ku ta bira un bèshi blanku chikitu ku kuater pipita den dje. Ta uz’é komo mata medisinal pa diferente kos. Tambe: mata di mondi o klásmulatu. | rabu di kabai (Randia aculeata) Mata òf palu ku por bira te 4 m haltu, ku stam smal, ku ta krese règt règt i ta saka kada be tres taki, semper na mes altura rònt di e stam, formando asina un korona. Ta ku e palu akí ta traha palu di lele pa lele guiambo i kadushi. Tambe: palu di lele; wakura (Bon). | rabu di mulina Blat largu, pegá horizontalmente na as di wil di mulina di bientu, pa dirigí e wil den e posishon ku e ta kue bientu pa asina pone e wil drei. Tambe: timon. | rabu di orkan E delaster parti di un orkan. | rabu di pushi (Celosia argentea) Mata ku blachi na forma di lansèt, flor hel, ros òf kòrá manera pluma. | rabu di souchi 1 Un tipo di djòin di palu. Tambe: sèfenstèl 2 Hèrmènt di karpinté. 3 Sorto di pleister, ku forma di rabu di souchi, ku ta uza, en bes di ganchu òf kosé, pa wanta un herida será. | rabu di wowo Skina di wowo. Romeo no a ripará ku mi tabata wak e ku mi rabu di wowo. | rabu di yuana (Kalanchoe verticillata) Mata sukulento ku blachi rondó i flor ros hel. | rabu garadó Rabu di sierto animal ku por uza pa gara, tene òf manipulá opheto. Tin algun sorto di makaku ku ta uza nan rabu prensil pa kologá na taki di palu. | rabu kòmpi Rabu chikí i kòrtiku. | Rabu mester hasi loke kachó manda. Na trabou, mester kumpli ku loke hefe bisa. | rabu stòmpi Rabu ekstremadamente kòrtiku. | robèki rabu blanku (Haemulon sciurus) Piská koló hel ku strepi blou horizontal, ku ta biba den ref di koral. | ronka na rabu Bisá di un hòmber ku ya no ta kapas mas (debí na su edat) pa tene relashon seksual. Su kasá a bisa ku mi tio a ronka na rabu kaba, a pesar ku e no a kumpli 70 aña ainda. | salta kachó, salta su rabu Si bo por a superá e parti mas difísil, sobrá tambe lo bo superá ku fasilidat. | wesu di rabu E parti final di wesu di lomba òf kolumna vertebral, e último kuater vértebranan deformá.
repchi s (anat) 1 Wesu largu, plat i fini pegá na kada banda di e kolumna vertebral i ku ta dobla yega te dilanti den pechu di kurpa di hende i animal vertebrá. Hende tin bintikuater repchi, diesdos kada banda, i huntu, nan ta forma e kashi di pechu òf di repchi. Repchi ta duna protekshon na e órganonan ku ta den e kashi di pechu. Otro funshon di repchi ta pa hasi ventilashon di e vianan respiratorio posibel. E víktima a sufri leshon rònt su kurpa, tambe na su repchinan, su pechu i su kabes. | kabes di repchi Bisá di kabes di hende di kua kueru di e nèk i kabes ta iploi. | kashi di repchi E konhunto di repchi ku ta forma manera un kashi pa protehá kurason, pulmon i otro órgano. Tambe: kashi di pechu. | Maske un makutu su repchi ta di banda, e tin su kargadó. Asta e hòmber òf muhé di mas mahos ta haña un muhé òf hòmber ku ta gust’é. Tambe: Kada wea tin su tapadera. Kada pan ku su keshi. | repchi di wowo Pida bístek ku rant di vèt, kòrtá di e karni na punta di repchi di baka. Tambe: rib-eye. | repchi repchi Sumamente flaku. E kachó di kaya no ta haña kuminda; e ta repchi repchi. | repchi saluRepchi di animal salgá ku ta uza komo ingrediente den sierto plato krioyo.