uñagatu s (Mimosa distachya var. oligacantha) (bot) 1 Mata di 1-2 m haltu, ku taki tur na sumpiña ku parse uña di pushi. Su flor koló ros òf lila ta krese na tròshi na forma di tapushi. E ta krese mas tantu na parti ost na Kòrsou, na Aruba, Boneiru, mas isla den Caribe, Colombia, Venezuela, México i Merka. Tambe: uña di gatu, uña di pushi; tarabara (Ar). Raská di uñagatu ta masha doloroso. Tin hende ta traha tranké di uñagatu pa stroba persona no deseá di drenta. 2 (Pithecellobium unguis-cati) Palu ku sumpiña di 4-6 m haltu, ku tin mas di un stam doblá, ku ta krese prinsipalmente den seru. Ta hañ’é for di Florida te parti nort di Suramérika, inkluso Caribe. Su flornan ta blanku hel. E tin baliña doblá, ku paden hel oraño, ku simia pretu. Ta uza su blachinan i kaska pa fin medisinal. Tambe: uña di gatu; dabaruida (Ar); pan ku keshi (Ar); bèshi di yuana (Bon).
universidat s 1 Institushon di enseñansa sientífiko i investigativo kaminda ta konsedé título akadémiko. Rèktòr di University of Curaçao (UoC) Dr. Moises da Costa Gomez a inougurá e aña universitario nobo. Na aña 2013, a konsedé Elis Juliana e título di Doctor Honoris Causa na University of Curaçao. 2 Edifisio o konhunto di edifisio kaminda ta duna e tipo di enseñansa menshoná na 1. Tur e pruebanan di atmishon ta tuma lugá na universidat mes. 3 Konhunto di persona ku ta forma parti di un universidat. Universidat kompleto a demostrá su desakuerdo ku maneho di gobièrnu. | universidat di pueblo Asosiashon di karakter lokal, dediká na formashon permanente, generalmente den oranan di anochi, i ku ta fungi komo sentro di edukashon sosio-kultural.
urbanisá v 1 v tr Desaroyá un aria rural pa medio di e instalashon- i operashonnan nesesario (traha kaya, pasa kabel di elektrisidat, kanal, tuberia, etc.) pa por konstruí riba dje, i e bira un sentro di poblashon. A urbanisá hopi di nos arianan rural kaba na Bándabou. 2 v tr Siña hende komportá nèchi, di forma síviko. Ku su lèsnan di urbanidat na radio, doña Laura tabata purba urbanisá su oyentenan infantil.
uster s (bio) 1 Nòmber komun pa diferente famia di molusko di awa salu ku tin un kokolishi di dos pida. Nan ta biba den awa no demasiado friu, serka di kosta. Tin ku ta komibel; nan parti paden tin un karni moli, koló shinishi. Esunnan ku ta kontené pèrla no ta komibel. Hopi hende gusta sòpi di uster, sea trahá ku uster fresku òf ku uster di bleki. 2 Tono di koló blanku ku ta tira un poko pa shinishi. M’a fèrf mi kamber koló blanku uster. | E ta manera uster. Bisá di un persona será, introvèrt. | sous di uster Sous diki, koló kasi pretu, un tiki sut, trahá di ekstrakto di uster. Sous di uster ta mashá usá den kushina oriental.
utensilio s 1 Opheto pa uso manual frekuente. Utensilio di kushina ta e.o. fòrki, kuchú i kuchara di tipo spesial pa usa den e proseso di kushinamentu. 2 Hèrmènt òf instrumento pa un aktividat profeshonal. Utensilio di karpinteria ta e.o. martin, zag, néiptan i bor. Utensilio di un kunukero, utensilio di un siruhano.