variante s 1 Kada un di e forma- o vershonnan di e mésun kos, mésun sorto, mésun klase, ku por rekonosé komo tal. Na aña 2015, investigadónan a deskubrí na Toronto un variante di sarampi te na e momento ei deskonosí. Mazurka di Kòrsou ta un variante di mazurka di Polonia. Tin variante di e famoso kansion ‘I did it my way’ na hopi idioma i hopi ritmo. E palabra ‘nogoshi’ ta un variante di ‘negoshi’. | variante leksikal kontekstual (ling) Forma di mes palabra ku mes nifikashon, pero ku restrikshon, mará na e konteksto. No ta uza e forma- o variantenan akí indiskriminadamente den tur situashon o konteksto. Tambe por ta ku un variante tin un nifikashon un poko distinto for di e otro variante(nan) di mes palabra. E verbonan ‘drei’ i ‘drai’ ta variante ku mes nifikashon, pero no ta bisa ‘drei metal’ sino ‘drai metal’ riba un draibank; pues nan ta variante kontekstual. Maske ‘muzik’ i ‘músika’ tin mes nifikashon i ta variante di mes palabra, no ta uza e variante ‘músika’ den e kombinashon fiho ‘muzik di zumbi’. | variante leksikal liber (ling) Forma ku diferensia fonétiko chikitu for di otro forma di mes palabra, pero ku mes nifikashon den tur konteksto i situashon. Kaminda por uza esun, por uza e otro tambe, ke men nan uzo ta liber. Tin hende ta bisa ‘bakuná’ i otro ta bisa ‘vakuná’; tur dos variante (leksikal liber) ta bon i aseptabel den tur konteksto i tur situashon.
vürwèrk s 1 Nòmber kolektivo pa opheto yená ku material kímiko eksplosivo i/o supstansia ku ta produsí efekto di lus briante i kolorido, ku ta sende e.o. durante selebrashon di fiesta i na fin di aña. Komo parti di e fiesta di kasamentu tabatin tiramentu di vürwèrk. Na fin di aña na nos isla semper tin show di vürwèrk. 2 (fig) Eksploshon di konflikto. Si e tres hendenan akí ta huntu, bo por spera vürwèrk promé ku e reunion kaba. 3 (fig) Espektákulo briante i sensashonal. Ora Celia Cruz i Oscar D’Leon topa riba tarima, ta vüwèrk tin.