wanta s 1 ( ¯´ _ ) Gòlpi òf sla fuerte propiná ku man habrí na kara òf kabes di hende. Mi tata a straf mi, pasobra m’a dal mi ruman un wanta. ‹sin› bòftá | zembla/pasa/hak u.h. un wanta Dal u.h. un wanta.
wanta v 1 ( _ ´¯ ) v tr Pone ku temporalmente algu no por sigui òf tuma lugá. Konseho di Minister a wanta tratamentu di e proyekto di lei pa buska mas konseho. Wes a wanta tratamentu di e kaso pa warda resultado di tèst di paternidat di e akusado. 2 v tr Soportá, tuma òf tolerá algu. E bòksdó a wanta basta sla promé ku el a bai lona. E no por a wanta e maltrato mas ku tur dia e tabata risibí. E mucha kasi no por a wanta e doló di djente. 3 v tr Sostené òf tene algu pa evitá ku esaki ta lòs òf kita kai. Tin kuater balki diki ta wanta e dak di eternit di nos pòrch. 4 v tr Reprimí, resistí òf kontené un impulso òf nesesidat pa hasi algu. El a wanta su lágrimanan te despues di entiero di su tata. Wanta set, hamber, pishi, pupu. 5 v tr Frena òf stroba algu ku ta òf por move di hasi esei. El a wanta e porta ku su pia pa e no bin dal sera. E portero a logra wanta e bala ku tabata bini riba gol. 6 v tr No por ku òf no tin lei ku u.h. òf ku u.k. Mi no por wanta kasá di mi ruman muhé, e ta masha arogante. Mi no por wanta e airu ku kua e ta bira kontestá hende. 7 v intr Sigui den un kondishon ku por dura òf resistí algun tempu mas. Mi ta kere ku e outo bieu akí lo wanta un par di aña mas. 8 v tr Retené òf konservá algu, p.e. awa òf kalor, di tal manera ku e no ta disparsé òf bai pèrdí. E baki tabata un buraku ku a koba den tera i fura despues ku plèstik pa wanta awa. Pluma di prikichi ta wanta kayente di manera ku su kurpa no ta kue friu ora p.e. áwaseru muh’é. 9 v tr Protehá kontra algu. E yas akí ta wanta friu bon. 10 v tr Tene algu na disposishon di u.h. Wancho, wanta mi lugá pa mi. Mi amiga a wanta e trabou pa mi despues ku mi a duna lus. Bo por a wanta e bukinan pa mi te otro siman? | (Ai,) wanta wanta. Kontesta ku sa duna pa indiká ku situashon no ta di gaba, ora u.h. saludá bo i puntra bo kon ta bai. | Esun ku ta hunga, mester wanta wega. Si bo no ta serio, bo mester wanta wega òf chansa. | Ora bo ta bou di palu, bo mester wanta kaka di para. Si bo ta dependé di u.h., bo mester soportá hopi kos na su man. Tambe: Ora bo man ta den boka di kachó, bo tin ku hila fini. | Riba buriku, wanta su tròt. Si bo no por atendé bo mes asuntunan, bo ta haña bo den problema. | Un tene, un wanta, un pusha … Ekspreshon uzá pa referí na esfuerso ku ta hasi pa logra algu. ‘Ai, ata nos akí, bo mes sa, un tene, un wanta, un pusha pa tene kabes riba awa.’ | wanta aden No mustra òf saka emoshon. | wanta atras 1 Skonde algu òf keda sin propagá òf divulgá algu. Tambe: tene atras. | wanta beter Bebe hopi bibida alkohóliko sin bira fuma. Tambe: wanta alkohòl. | Wanta bo wil pa mi no baha bo chup!Kuidou ku loke bo ta papia pa mi no regla bo kuenta pa bo. | wanta brek 1 Redusí, baha velosidat, no avansá òf hasi esaki ku ménos velosidat. 2 (fig) Bai ku moderashon, baha man. | wanta duru No tambaliá den un situashon difísil, sino resistí i keda stabil. | wanta gora Mata tempu, kumpliendo ku un deber mas o ménos forsosamente. Ayera nochi mi a sinta wanta gora na e fiesta, miéntras mi dos yu muhénan tabata balia dibertí. | wanta hòmber Bisá di hende muhé ku sa di trata i satisfasé un hòmber di tal manera ku esaki no ta bandon’é. | wanta ku Para, no sigui òf no kontinuá ku un aktividat. Mi a wanta un ratu ku tur mi proyektonan. Temor i inseguridat por pone ku u.h. ta wanta ku boutismo i kombershon. | Wanta pa bo gosa! 1 Ku pasenshi u.h. ta alkansá su meta. 2 Warda ku pasenshi, un be bo ta haña sa loke bo ke sa. 3 Si bo ke ta bunita, bo mester soportá hopi molèster. | Wanta riba furu di zjilèt. Kontesta grasioso riba e pregunta: ‘Kon ta bai?’, pa duna di konosé ku finansieramente kos ta malu p’e persona, i ku apénas e por kumpli ku su kompromisonan. | wanta ritmo 1 Mantené òf keda den kompas. 2 (fig) No tambaliá. | wanta stoma Kome algu chikí pa aliviá e sensashon di hamber. | wanta stòrm Siña dil, anda ku desapunto. | Wanta (mi) un kabei! Warda un ratu. Tene un tiki pasenshi. Tambe: Wanta un kachete! Wanta un pinga!